Türkiyədə baş verən zəlzələdən əziyyət çəkən insanlara Azərbaycandan 120-dən çox yük maşını ilə yardım daşınıb. Hazırda da müxtəlif regionlardan, eləcə də Naxçıvandan bu daşımalar davam edir.
Bu sözləri ABADA-nın İdarə Heyətinin üzvü, “Kristal 2008” şirkətinin rəhbəri Azad Cəfərov deyib.
Onun sözlərinə görə, təbii fəlakətdən sonra ölkəmizdən toplanan yardımların daşınması üçün Türkiyə səfirliyindən, qardaş ölkədən olan iş, biznes adamlarından xahişlər daxil olurdu: "Biz də, yəni daşıyıcı şirkətlər bu xahişləri nəzərə alaraq, daşınma qaydalarına uyğun olaraq hazırlanan yardımların müqdarını müəyyən etdikdən sonra 20-dən çox yük maşınını təmənnasız olaraq bu işlərə cəlb etdik. Sonrakı günlərdə isə, Rəqəmsal İnkişaf və Nəqliyyat Nazirliyi və ABADA tərəfindən işlərin kordinasiyalı görülməsi ilə bağlı qərar qəbul edildi. Aparılan yardımlara görə, hər hansısa ödəniş qəbul edilməyib. Bütün şirkətlər, təmənna güdmədən xidmət göstəriblər. Eyni zamanda yüklərin daşınması ilə bağlı lazımi sənədlər də nazirlik və ABADA tərəfindən təmin edilib”.
A.Cəfərovun sözlərinə görə, fəlakət zonasına yardım aparan TIR-lar Türkiyə ərazisində də yardım, təchizat, təminat yüklərinin daşınmasında iştirak edirlər. O qeyd edib ki, əlavə olaraq yüzlərlə TIR yardımların qardaş ölkəyə daşınması üçün hazır vəziyyətə gətirilib.
